Hebrews 7

मलकिसिदक पुरोहित

1ए मलकिसिदक सालेम के राजा अऊ परम परधान परमेसर के एक पुरोहित रिहिस। जब अब्राहम ह राजामन ला हराके लहुंटत रिहिस, त ओह अब्राहम ले भेंट करिस अऊ ओला आसिस दीस; 2अऊ अब्राहम ह ओला हर एक चीज के दसवां भाग दीस। मलकिसिदक नांव के पहिली मतलब होथे – “धरमीपन के राजा” तब ए नांव के मतलब “सालेम के राजा” याने कि “सांति के राजा” घलो होथे। 3मलकिसिदक के दाई या ददा या ओकर पुरखा के कोनो पता नइं ए। ओकर जनम अऊ ओकर मिरतू के घलो कोनो लेखा नइं ए। ओह परमेसर के बेटा के सहीं सदाकाल बर एक पुरोहित अय।

4तुमन सोचव कि ओह कतेक महान रिहिस; अऊ त अऊ कुल के मुखिया अब्राहम ह ओला लड़ई म लूटे गय माल के दसवां भाग दीस। 5लेवी के बंस म ले जऊन मन पुरोहित बनथें, ओमन ला मूसा के कानून ह हुकूम देथे कि ओमन मनखेमन ले दसवां भाग जमा करंय, अऊ ए मनखेमन ओमन के भाई अंय, हालाकि ए भाईमन घलो अब्राहम के बंस अंय। 6पर मलकिसिदक ह लेवी के बंस के नइं रिहिस, तभो ले ओह अब्राहम ले दसवां भाग लीस अऊ ओला आसिस दीस, जेकर करा परमेसर के परतिगियां रिहिस। 7अऊ ए बात म कोनो संदेह नइं ए कि छोटे मनखे ह बड़े मनखे ले आसिस पाथे। 8पुरोहितमन के मामला म, दसवां भाग ओ मनखेमन के दुवारा लिये जाथे, जऊन मन मर जाथें, पर मलकिसिदक के मामला म, दसवां भाग ओकर दुवारा लिये गीस, जेकर बारे म ए गवाही दे गे हवय कि ओह जीयथे। 9त हमन ए कह सकथन कि लेवी जऊन ह दसवां भाग लेथे, ओह अब्राहम के जरिये दसवां भाग दीस। 10काबरकि जब मलकिसिदक ह अब्राहम ले मिलिस, त लेवी ह अपन पुरखा अब्राहम के सरीर म, ओ समय रिहिस।

यीसू ह मलकिसिदक के सहीं

11यदि लेवीमन के पुरोहित पद के जरिये सिद्धता मिलतिस (काबरकि एकरे आधार म, मनखेमन ला मूसा के कानून ह दिये गीस), त फेर एकर का जरूरत रिहिस कि एक आने पुरोहित ह हारून के जाति म ले नइं, पर मलकिसिदक के जाति म ले आवय? 12काबरकि जब पुरोहित पद ह बदले जाथे, तब मूसा के कानून घलो बदलना जरूरी ए। 13हमर परभू जेकर बारे म ए जम्मो बात कहे जाथे, ओह एक आने गोत्र के अय अऊ ओ गोत्र म ले, कोनो अभी तक बेदी म पुरोहित के रूप म सेवा नइं करे हवंय। 14काबरकि ए बात ह साफ ए कि हमर परभू ह यहूदा के गोत्र म ले आईस अऊ ए गोत्र के बिसय म मूसा ह पुरोहित पद के कुछू चरचा नइं करे हवय। 15अऊ जऊन बात हमन कहे हवन, ओह अऊ साफ हवय कि मलकिसिदक के सहीं एक आने पुरोहित परगट होईस, 16जऊन ह अपन पुरखामन के नियम के आधार म पुरोहित नइं बनिस, पर ओह अमर जिनगी के सामरथ के आधार म पुरोहित बनिस। 17काबरकि ओकर बारे म ए कहे गे हवय:

“तेंह मलकिसिदक के सहीं सदाकाल बर एक पुरोहित अस।” ▼

▼भजन-संहिता 110:4

18पहिली के नियम ला अलग कर दिये गीस, काबरकि एह कमजोर अऊ बेकार रिहिस। 19(काबरकि मूसा के कानून ह कोनो भी चीज ला सिद्ध नइं बनाईस), अऊ अब एक उत्तम आसा दिये गे हवय, जेकर दुवारा हमन परमेसर के लकठा म जाथन।

20अऊ एह बिना कसम (किरिया) के नइं रिहिस। आने मन बिगर कोनो कसम के पुरोहित बनिन, 21पर ओह (यीसू) एक कसम के संग पुरोहित बनिस, जब परमेसर ह ओला कहिस:

“परभू ह कसम खाईस
अऊ ओह अपन मन ला नइं बदलय,
तेंह सदाकाल बर एक पुरोहित अस।” ▼

▼भजन-संहिता 110:4

22ए कसम के कारन, यीसू ह अऊ बने करार के जमानतदार हो गीस।

23पहिली बहुंत पुरोहितमन रिहिन, पर ओमन अपन काम पूरा नइं कर सकिन काबरकि ओमन मर गीन; 24पर यीसू ह सदाकाल बर जीयथे; ओकर पुरोहित पद ह सदाकाल बर ए। 25एकरसेति, ओह ओमन के पूरा-पूरी उद्धार कर सकथे, जऊन मन ओकर जरिये परमेसर करा आथें, काबरकि ओह ओमन खातिर बिनती करे बर हमेसा जीयत हवय।

26अइसने महा पुरोहित ह हमर जरूरत ला पूरा करथे, जऊन ह पबितर, निरदोस अऊ सुध ए। ओह पापीमन ले अलग करे गे हवय अऊ स्वरगमन ले ऊंचा उठाय गे हवय। 27आने महा पुरोहितमन सहीं, ओला दिन प्रतिदिन पहिली अपन खुद के पाप खातिर अऊ तब मनखेमन के पाप खातिर बलि चघाय के जरूरत नइं ए। ओह अपन-आप ला ओमन के पाप बर बलि चघाके, ए काम ला सदाकाल खातिर एकेच बार म पूरा कर दीस। 28काबरकि मूसा के कानून ह ओ मनखेमन ला महा पुरोहित के रूप म ठहिराथे, जऊन मन सिद्ध नो हंय; पर परमेसर के कसम, जऊन ह मूसा के कानून के बाद आईस, ओ बेटा ला ठहिराईस, जऊन ह सदाकाल के खातिर सिद्ध बनाय गे हवय।